"Şuşa - Türk Dünyasının Mədəniyyət Paytaxtı 2023" ilinin rəsmi loqosu şəhərin unikal təbii və mədəni irsindən ilhamlanaraq yaradılmışdır.

- Loqo ümumilikdə Azərbaycan dövlətinin əsas simvollarından biri olan səkkizguşəli ulduz formasında hazırlanmışdır.

- Tarixi Şuşa Qalasının günümüzə qədər gəlib çıxmış Gəncə Qapısının Şərq memarlığına xas tağvari forması loqonun bütün guşələrində istifadə edilməklə tarix-memarlıq qoruğunu simvolizə edir.

- Gəncə qapısı ətrafında daşların düzülüş formasından əmələ gələn ornamentlər loqoda əks olunan abidənin məhz Şuşaya aid olduğuna işarə edir.

- Mədəni irsi ilə yanaşı, Şuşanın unikal təbii irsi də loqoda təcəssüm etdirilir. Şuşa təbiətinə məxsus Xarı-bülbül gülünün ləçəkləri loqonun formasını yaradan əsas ilham mənbələrindən biri kimi çıxış etmişdir

- Nəhayət emlemin altında əks olunmuş "Şuşa 2023" yazısı qalanın üzərində əksini tapan şəhərin adı ilə eyni şriftdə işlənilmişdir.  

Loqo Mədəniyyət Nazirliyinin sifarişi ilə dizayner Rövşən Nəsibli tərəfindən hazırlanmışdır.